वाळू व्यवसायिक संतोष जगताप यांचा उरुळी कांचन येथे झालेल्या गोळीबारात मृत्यू..

जनता एक्सप्रेस मराठी न्यूज दौंड प्रतिनिधी
अजय तोडकर मो.नं.7776027968

उरुळी कांचन : उरुळी कांचन (ता. हवेली) येथील हॉटेल सोनाई समोर राहु (ता. दौंड) येथील वाळू व्यवसायिक संतोष संपतराव जगताप यांच्यावर चार ते पाच अज्ञात इसमांनी आज शुक्रवार (ता. 22) दुपारी अडीच वाजण्याच्या सुमारास गोळीबार केला. यात संतोष जगताप यांचा मृत्यू झाला. तर संतोष जगताप यांनी जखमी अवस्थेत प्रत्युत्तरादाखल केलेल्या गोळीबारात एक हल्लेखोर ठार झाल्याचे पुढे आले, तर तीन ते चार जण पळून जाण्यात यशस्वी झाले आहेत. तसेच संतोष जगताप यांचा अंगरक्षक जखमी झाला असून त्याच्यावर लोणी काळभोर येथील विश्वराज हॉस्पिटल मध्ये उपचार सुरु आहे.
संतोष जगताप दुपारी अडीच वाजण्याच्या सुमारास पुणे सोलापूर महामार्गावरील हॉटेल सोनाई समोर चर्चा करीत असताना रस्त्याच्या बाजूने आलेल्या चार ते पाच जणांनी संतोष जगताप यांच्या अंगरक्षकवर घातक हत्याराने हल्ला चढविला, तसेच गोळीबारही केला. यात संतोष जगताप व त्यांचा अंगरक्षक गंभीर जखमी झाले तर जखमी अवस्थेत संतोष जगताप यांनी हल्लेखोरांना प्रत्युत्तर देत असताना गोळीबार केला, यात एक हल्लेखोर जागीच ठार झाला. तर उर्वरित पळून जाण्यात यशस्वी ठरले. संतोष जगताप यांना लोणी काळभोर येथील विश्वराज हॉस्पिटल येथे दाखल केले असता त्यांचा उपचारादरम्यान मृत्यू झाला असल्याचे डॉक्टरांनी जाहीर केले. लोणी काळभोर पोलीस घटनास्थळी दाखल झाले असून पुढील तपास चालू आहे.