भिगवण: ग्रामपंचायत कराच्या थकबाकीमुळे भिगवण येथील महाराष्ट्र राज्य विद्युत पारेषण कार्यालयाला ग्रामपंचायत विभागाकडून टाळे ठोकण्यात आले. वीज बिल थकल्यावर ग्राहकाची वीज कापणाऱ्या विभागाला ग्रामपंचायत विभागाने घरपट्टी आणि कर न भरल्यामुळे टाळे लाऊन दणका दिला असल्याचे दिसून आले.
याबाबत भिगवण गावचे सरपंच तानाजी वायसे आणि ग्रामविकास अधिकारी यांनी दिलेल्या माहिती नुसार पारेषण च्या भिगवण कार्यालयाची कराची थकबाकी २ कोटी १७ लाख रुपये असून अनेक वेळा याची मागणी करण्यात येत होती.याविषयी अनेक वेळा बिल आणि नोटीस देण्यात आली होती मात्र याकडे महापारेषण जाणूनबुजून टाळाटाळ करत असल्याचे दिसून आले.याबाबत वरिष्ठ कार्यालयाला कळवूनही कोणतीही अमलबजावणी करण्यात आली नाही. ग्रामपंचायत हि स्वायत्त संस्था असल्यामुळे नागरिकांना सेवा पुरवीत असताना निधी उपलब्ध होणे आवश्यक असताना थकबाकी बाबत कोणाताही निर्णय झाला असल्यामुळे ग्रामपंचायत विभागाने हा निर्णय घेतला. टाळा लावण्या अगोदर ग्रामपंचायत विभागाने रीतसर सूचना या विभागाला तसेच वरिष्ठ कार्यालय आणि पोलीस ठाण्याला दिल्या होत्या आणि रीतसर पद्धतीने कार्यालयाला टाळे ठोकण्यात आल्याचे यावेळी सांगण्यात आले.यावेळी गावचे सरपंच तानाजी वायसे ,पंचायत समितीचे उपसभापती संजय देहाडे ,कर्मयोगीचे संचालक पराग जाधव,तुषार क्षीरसागर ,कपिल भाकरे ,सत्यवान भोसले ,जावेद शेख ,गुराप्पा पवार ,अमोल वाघ तसेच ग्रामविकास अधिकारी सागर परदेशी ,हनुमंत चांदगुडे ,बाळासाहेब जगताप उपस्थित होते. ऐन उन्हाळ्यात व उभ्या पिकांना पाण्याची आवश्यकता असण्याच्या वेळी वीजबिलाच्या थकबाकी वरून महावितरणने अनेक शेतकऱ्यांचे डीपी सोडवण्याच्या घटना आपण पाहिल्या आहेत पण आता महावितरणलाच कुलूप ठोकल्याने पंचक्रोशीतील शेतकऱ्यांमध्ये मात्र चर्चेला उधाण आला आहे. दरम्यान ,आता महावितरणने बीडीओ इंदापूर यांच्याकडे याबाबतीत दाद मागितली असून निकाल लागेपर्यंत नागरिकांची गैरसोय होऊ नये या कारणासाठी पुन्हा महावितरण कार्यालय उघडल्याची माहिती मिळाली आहे.दरम्यान ग्रामपंचायत ने महावितरणकडून 10 लाख रुपयांच्या वसुलीचा चेक ही घेतलेली माहिती मिळाली आहे.
