खडकवासला कालव्यातून आवर्तन सोडावे – हर्षवर्धन पाटील
इंदापूर : प्रतिनिधी दि.16/2/23
खडकवासला कालव्यातून इंदापूर तालुक्यातील शेतीसाठी उन्हाळी हंगामातील आवर्तन सोडण्यात यावे, अशी मागणी भाजप नेते व माजी मंत्री हर्षवर्धन पाटील यांनी जलसंपदाकडे केले आहे. या संदर्भात हर्षवर्धन पाटील यांनी जलसंपदाच्या वरिष्ठ अधिकाऱ्यांशी दूरध्वनीवरून गुरुवारी चर्चा केली.
खडकवासला साखळी धरणामध्ये समाधानकारक पाणीसाठा उपलब्ध आहे. सध्या शेतामध्ये ऊस व इतर पिके उभी असून दररोज तापमानात वाढ होत चालल्याने पिकांना पाण्याची गरज निर्माण झाली आहे. त्यामुळे खडकवासला कालव्यातून आवर्तन सोडल्यास उभ्या पिकांना दिलासा मिळणार आहे. तसेच आवर्तन सोडल्यास लाभक्षेत्रातील तलावांमध्ये पाणी सोडता येईल, असे हर्षवर्धन पाटील यांनी नमूद केले.
खडकवासला कालव्याच्या लाभक्षेत्रात इंदापूर तालुक्यातील शेटफळगढे, निरगुडे, पिंपळे, पोंधवडी, अकोले, भादलवाडी, कळस, पिलेवाडी, गोसावीवाडी, डाळज, रुई, न्हावी, लोणी देवकर, बळपुडी, कौठळी, खामगळवाडी, बिजवडी, पोंदकुलवाडी आदी अनेक गावे येतात. खडकवासला कालव्यातून आवर्तन सोडणे संदर्भात लवकरच नियोजन केले जाईल, असे यावेळी जलसंपदाच्या अधिकाऱ्यांनी सांगितले.
