उपसंपादक: संतोष तावरे
प्रादेशिक हवामान विभाग, यांचेकडून हवामान विषयक मिळालेल्या पूर्व सुचनेच्या अनुषंगाने पुणे जिल्ह्यात दिनांक ७ सप्टेंबर २०२२ ते दिनांक ११ सप्टेंबर २०२२ या कालावधीत जिल्ह्यात यलो अलर्ट जारी केला असून तुरळक ठिकाणी मेघ गर्जनेसह पाऊस पडण्याची व विजा चमकण्याची शक्यता हवामान विभागाने वर्तविलेली आहे. त्यामुळे या कालावधीत नागरिकांनी दक्षता घेण्याचे आवाहन जिल्हा आपत्ती व्यवस्थापन प्राधिकरण,पुणे मार्फत करण्यात येत आहे.लोकांनी घाबरून न जाता आपली व आपल्या कुटुंबाची काळजी घ्यावी.
विजा चमकत असताना पुढीलप्रमाणे दक्षता घेण्यात यावी १) विजा चमकत असताना संगणक, टीव्ही इत्यादी विद्युत उपकरणे बंद ठेवून विद्युत स्त्रोतांपासून अलग करून ठेवावीत.२) दूरध्वनी, भ्रमणध्वनी चा वापर टाळावा, ३) विजा चमकत असताना नागरिकांनी घराबाहेर पडू नये. घराबाहेर असल्यास सुरक्षित ठिकाणी आश्रय घ्यावा, ४) विजेच्या खांबांपासून लांब रहावे. ५) विजा चमकत असताना उंच झाडाखाली आश्रयास थांबू नये. ६ ) विजा चमकत असताना एखाद्या मोकळ्या परिसरात असल्यास , गुडघ्यामध्ये डोके घालून वाकून बसावे.धातूच्या वस्तू दूर ठेवाव्यात. सततच्या पडणा-या मुसळधार पावसात पुढीलप्रमाणे दक्षता घ्यावी १)मुसळधार पावसात आवश्यकता नसल्यास घराबाहेर जाणे टाळा. घराबाहेर अथवा असुरक्षित ठिकाणी असल्यास पाऊस थांबेपर्यंत सुरक्षीत ठिकाणी आसरा घ्या. ३ )अतिमुसळधार व अतिवृष्टीच्या परिस्थितीत कोणत्याही परिस्थितीत सुरक्षित ठिकाणी राहा व पायी अथवा वाहनाने प्रवास करू नका.३) घराबाहेर पडणे अत्यावश्यक असल्यास निघण्यापूर्वी अधिकृत स्त्रोतांकडून हवामानाची, रेल्वेची व रस्तेे वाहतुकीची व पाणी तुंबलेल्या ठिकाणांची माहिती करून घ्या,४ ) पाऊस पडत असताना विजा चमकत असल्यास झाडाखाली उभे राहू नये. मोबाईलवर संभाषण करू नये आणि इलेक्‍ट्रिक वस्तूंपासून दुर रहावे. अशा परिस्थितीत पक्के घर किंवा इमारतीत आसरा घ्यावा.५) मुसळधार पावसामुळे उद्भवलेल्या कुठल्याही प्रकारच्या आपत्कालीन परिस्थितीमध्ये मदतीसाठी जिल्हा नियंत्रण कक्ष (०२०) २६१२३३७१ किंवा टोल फ्री १०७७ ला संपर्क करावा कुठल्याही अफवांवर विश्‍वास ठेवू नका व अफवा पसरवू नका. अतिवृष्टी कालावधीत झाडे पडणे, घर किंवा इमारत कोसळणे,शक्यता असते अशावेळी नागरिकांनी सतर्क राहावे.आपत्कालीन स्थिती उद्भवण्याची शक्यता असलेल्या ठिकाणी जसे दरड प्रवण क्षेत्र या ठिकाणी आपण राहत असल्यास प्रशासनाकडून मिळणा-या सूचनांचे पालन करावे. पूर प्रवण क्षेत्र व पाणी तुंबण्याची ठिकाणे या ठिकाणी आपत्कालीन परिस्थिती उद्भवल्यास त्या बाबत जागरूक राहावे व योग्य ती दक्षता घेण्यात यावी.
जुन्या मोडकळीस आलेल्या इमारती, पूल इ. ठिकाणी जावू नये.अतिवृष्टी होत असताना कोणीही नदी-नाले इ.ठिकाणी जावू नये. अतिवृष्टी कालावधीत रस्ते निसरडे बनल्याने अपघात होण्याची शक्यता नाकारता येत नाही तरी वाहन चालवताना आवश्यक ती काळजी घेण्यात यावी. पुराच्या पाण्याजवळ अथवा नदी पात्रात उभे राहून नागरिकांनी सेल्फी काढू नये. आपत्कालीन स्थितीत सेल्फीकाढून नागरिकांनी स्वत:चा जीव धोक्यात घालू नये. हवामान विभागाकडून दिलेल्या इशा-याच्या पार्श्वभूमीवर नागरिकांनी आपल्या जीवित व मालमत्तेची काळजी घ्यावी .या सर्व सूचनांचे पालन करून काळजी घ्यावी असे आवाहन प्रशासनाकडून केले आहे.
